Menu


 

 

   Tokante nos

 

Fundashon Sonrisa ta sostené hende pa ta mas independiente i por yuda nan mes. Na Fundashon Sonrisa bo ta haña chèns pa biba riba bo mes, ku guia profeshonal. Nos habitante i bishitantenan ta partisipá na aktividatnan di okupashon di dia den nos sentro di aktividat. Nos ta brinda servisio na midí pa personanan ku problema sikiátriko króniko. Fundashon Sonrisa ta ofresé hende ku un malesa mental króniko:

  • E chèns pa ku guia profeshonal biba riba nan mes. E ta ofresé de opshonnan ‘biba na eskala chikitu’ i biba riba bo mes ku guia’.
  • Un gran variedat di aktividat den su sentro di aktividat.

E oferta di tratamentu ta konsistí di un kombinashon di fasilidatnan di bibienda, pasadia i un sentro di aktividat. Nos ta duna guia residensial na alrededor di 40 kliente i tin lugá pa 70 hende den nos sentro di aktividat.

Nos mishon

 

Sonrisa ta kontestá e deseo di hende ku un problema sikiátriko, pa mas independiente posibel, pero ku giua pa asina largu ku esaki ta nesesario, forma un propio bida. Na base di e guia di biba ta e vishon di kuido basá riba rekuperashon i kresementu. Esaki ta nifiká promoshon di e independensia, abilidat pa yuda su mes, posibilidat i kapasidatnan di e kliente. Den esaki ta tene kuenta ku e limitashonnan di e kliente. E papel di e guia ta pa duna sosten i guia ora esaki ta berdaderamente nesesario.

Kaminda ku ta posibel, Fundashon Sonrisa ta forma un stashon intermiediario riba kaminda pa independiensia mas grandi pa klientenan. Fundashon Sonrisa ta aspirá laga klientenan sigui pa fasilidatnan ku un karakter ménos protektor. Den práktika esaki no ta pa tur kliente posibel. Na e grupo akí Fundashon Sonrisa ta brinda sosten i guia mas o ménos permanente.

Den nos trabou nos ta laga e siguiente ponensia guia nos:

Huntu traha na kresementu i rekuperashon

 

Huntu                                                 
Nos ta traha huntu ku e kliente. Den e tratamentu i guia nos ta buska huntu ku e kliente i esnan serka di dje pa konekshon ku su mes deseo i nesesidatnan. Nos trahadónan ta para banda di e kliente, sin disidí pa nan kiko nan mester hasi.

Nos ta traha multidisiplinario huntu den e tratamentu i guia di e kliente; sikater, sikólogo, casemanager i guia ta komplementá otro i ta koordiná nan maneho ku otro.

Staf, departamentunan di kuido i servisionan di sosten ta traha huntu, den kual semper e interes di e kliente ta para sentral.

Ta traha huntu tambe ku otro partnernan den kuido. I kolaborashon ku partnernan den área di bibienda i trabou tambe ta indispensabel.

Kresementu
Nos ta dirigí nos mes riba e persona kompletu tras di e diagnósis i ta sali for di loke hendenan por. Nos ta yuda klientenan fortifiká nan propio forsa. Esaki ta manifestá su mes den rekobrá un bida mas independiente posibel i tuma parti mas ful posibel na komunidat.

Rekuperashon
E tratamentu i guia ku nos ta duna e klientenan ta na promé instante dirigí riba kura. Den algun kaso sinembargo kura no ta posibel. E or'ei e atenshon ta bai pa sostené rekuperashon. Ku rekuperashon den e konteksto akí kemen duna sentido i nifikashon nobo na bida despues ku surgi problema mental króniko. Rekuperashon ta e proseso di e kliente mes; e propio historia di e kliente ta para sentral serka nos.

 

Nos vishon

 

No health without mental health

 

Nos ta bai pa reintegrashon na midí, saliendo for di e deseo, interes i posibilidatnan di e pididó di yudansa, o sea e kliente. Den e guia nos ta pone enfoke riba e parti salú di e habitante i bishitantenan.

  • Nos ta konsentrá riba e kapasidatnan di nos klientenan i ta yuda sigui desaroyá esakinan.
  • Nos ta sostené personanan pa bira mas independiente i kombativo.
  • Nos ta yuda hendenan pa oumentá nan outokonfiansa i pa hiba un bida digno di ser humano.

Kada kliente ta úniko e mester di un propio aserkamentu. P’esei trabou na midí ta importante. Kada habitante i bishitante ta haña un plan di guia na midí. Ta deliberá kontenido di e plan ku esun konerní, e guianan, i ku e dunadó di tratamentu. Den e plan di guia tin e metanan riba kual e habitante/bishitante ta bai traha. Ta trata metanan práktiko i konkreto, ku por realisá den pasonan chikitu.

 

Nos balornan núkleo

 

GGz Curaçao ta manehá un kompas étiko ku ta duna rumbo na e manera ku nos ta traha den nos fundashonnan. E kompas akí ta enserá tres balor núkleo ku ta den liña ku nos vishon i ta yuda realisá nos metanan.

Kapas

Nos ta kapabel den nos profeshon. Nos por loke klientenan, koleganan i komunidat mag di spera di nos i asta mas. Nos ta keda siña pa mantené nos konosementu na nivel.

 

Konfiabel

Nos ta konfiabel. Nos ta hasi loke klientenan, koleganan i komunidat mag di spera di nos.

 

Ku Kurason

Nos ta traha ku alma i kurpa pa nos klientenan, nos ta komprometí ku nan i nos koleganan i komunidat. Saliendo for di un sintimentu di union i igualdat, nos ta kontribuí na e mishon di GGz Curaçao.

Maneho

Maneho diario ta den man di Locatiemanager Agatha van Randwijk-Spalburg.

 

Nos historia den kòrtiku

 

1977 Fundashon Sonrisa lantá.
1986 Inougurashon 17 habitashon di 1 kamber na Uteweg.
1992 Ekspanshon ku sentro di aktividat i seis “aanleunwoningen”.
2002 Inougurashon kasnan pa biba independiente ku guia.
2011 Afiliashon ku GGz Curaçao.

Di unda nos nòmbernan ta bini?

Sonrisa E ofresementu di un ambiente sigur pa biba mas òf ménos independiente ta sòru pa un “sonrisa” den e bida di e habitantenan.

Kas Theo Doran Tin nòmber di un di e brudernan sosial sikiátriko di “Afdeling Geestelijke Volksgezondheid” (AVG) di den kuminsamentu di Sonrisa. Theo tabata hopi enbolbí ku e habitantenan di Fundashon Sonrisa.

Sentro di aktividat Adriaan Tin nòmber di Adriaan van der Hoeven, presidente bieu di Fundashon Sonrisa. Adriaan a nifiká masha hopi pa e fundashon i tabata e motror tras di realisashon di un edifisio nobo pa Fundashon Sonrisa.