Fundashon Sonrisa ta ofresé hende ku un malesa mental króniko:

• E chèns pa ku guia profeshonal biba riba nan mes. E ta ofresé de opshonnan ‘biba na eskala chikitu’ i biba riba bo mes ku guia’.
• Un gran variedat di aktividat den su sentro di aktividat.

E oferta di tratamentu ta konsistí di un kombinashon di fasilidatnan di bibienda, pasadia i un sentro di aktividat. Nos ta duna guia residensial na alrededor di 36 kliente i tin lugá pa 70 hende den nos sentro di aktividat.

Kon pa drenta Fundashon Sonrisa?
 

Un sikiater, dòkter di kas, enfermera/bruder sosialsikiátriko (spv’er = sociaalpsychiatrische verpleegkundige) por referí òf pidi pa traslado for di Klínika Capriles, poli/PAAZ òf FMA. Instansianan eksterno manera Maatschap i Skuchami tambe por referí nan klientenan pa Fundashon Sonrisa. Kondishon ta sí ku e kliente tin un diagnosis sikiátriko. Ora bo tuma kontakto ku Fundashon Sonrisa komo profeshonal, bo por akudí na e lider di tim òf mènedjer di sitio.

Komo esun ku ta referí, bo tin un papel importante den e ayudo. Huntu ku bo kliente bo ta determiná si un referensia ta nesesario. Esnan ku ta referí por pidi un formulario di registrashon na Fundashon Sonrisa sea via telefòn +5999 737 9233 òf via mail: sonrisa@ggz.cw. E formulario kompletá, bo por manda pa e lider di tim i/òf kordinadó.